Nadakpan sa mga operatiba sa Surigao del Norte Police Provincial Office (SDNPPO) ang usa ka 52-anyos nga lalaki nga notadong Top 10 Most Wanted Persons sa Caraga Region, atol sa manhunt operation sa Barangay Sabang, dakbayan sa Surigao.
Ang suspetsado, usa ka biyudo ug panday nga residente sa Barangay Mabua, Surigao City, nag-atubang og mga kaso nga Qualified Rape ug Lascivious Conduct.
Ang operasyon gikasa sa Surigao Component City Police Station, RIU 13 PIT Surigao del Norte, ug 1st Surigao del Norte Provincial Mobile Force Company.
Base sa rekord sa kapolisan, gipagawas sa Regional Trial Court Branch 29 sa Surigao City ang warrant of arrest niadtong Mayo 26, 2026 alang sa duha ka kaso sa Qualified Rape ug usa ka kaso sa Lascivious Conduct.
Walay gitakdang piyansa alang sa mga kaso sa Qualified Rape, samtang adunay piyansang P180,000 alang sa kaso sa Lascivious Conduct.
Gisusi usab sa kapolisan nga ang mga kaso may kalabutan sa giingong sekswal nga pag-abuso batok sa iyang menor-de-edad nga stepdaughter sa nagkalainlaing higayon tali sa Nobyembre 2025 ug Enero 2026.
Ang biktima giingong nakasinati og kahadlok ug emosyonal nga kalisang tungod sa nahitabo.
