Usa ka babaye sa United Kingdom ang naka pa kurat ug nakapakatawa sa daghang tawo human iyang gipahimo nga eyeliner tattoo nga gisagulan sa abo sa iyang namatay nga iro nga si Patch.
Si Claire Hobson, usa ka makeup artist, ang dili kumbinsido nga e butang lang sa jar ang abo sa iyang pinangga nga fur baby samtang siya mo biyahi pa sa Dubai. Mao nga nakahunahuna siya og talagsaong paagi aron pirmi niyang madala ang iyang pinalanggang alaga.
Inay nga ibutang sa kwintas o sudlanan, iyang gihangyo ang usa ka kauban nga makeup artist nga sagulan ang gamayng bahin sa abo ni Patch ngadto sa tinta sa semi-permanent eyeliner. Dayon kini gipatato sa iyang mga tabontabon sa mata.
Matod ni Claire, gusto niya nga mura gihapon og makita ni Patch ang kalibutan pinaagi sa iyang mga mata. Bisan siya mismo miangkon nga medyo “buang-buang” ang ideya, apan malipayon siya nga natuman kini.
Tungod kay molungtad og pipila ka tuig ang maong eyeliner, matod pa niya nga kung panahon na sa retouch, adunay nahabiling abo si Patch nga magamit.
Busa kung naa kay makita nga babaye nga pirming hayag ang eyeliner, basin make-up ra na. Pero kang Claire, posible nga ang iyang iro mismo ang nagbantay sa iyang panan-aw matag adlaw.
Photo courtesy: Press Reader
