Gipahibalo niadtong Hunyo 3, 2026 ni Police Major Neil Mark Quipanes, Station Commander sa Iligan City Police Station 5 (ICPS-5), ang paglunsad sa Project Safe Link, usa ka lokal nga digital community policing initiative nga nagtumong sa pagpasayon ug pagpadali sa pagreport sa mga insidente ug kadudahang kalihokan sa komunidad.
Pinaagi sa maong programa, mahimo nang makahatag og impormasyon ang mga residente pinaagi sa pag-scan lamang sa usa ka QR code nga direktang modala kanila ngadto sa usa ka luwas nga online reporting platform.
Gipasabot ni Quipanes nga usa sa labing mahinungdanong bahin sa Project Safe Link mao ang hingpit nga pagpanalipod sa identidad sa mga nagreport. Dili na kinahanglan ang paghatag sa ngalan, numero sa telepono, o bisan unsang personal nga impormasyon aron makasumite og report.
Dugang pa, 24 oras nga magamit ang sistema, nga nagtugot sa mga lumulupyo sa pagreport sa mga insidente sa bisan unsang oras nga wala na kinahanglana ang personal nga pag-adto sa estasyon sa kapolisan.
Kabahin usab sa programa ang pagpalig-on sa kolaborasyon tali sa kapolisan ug mga barangay aron mas mapadali ang pagresponde sa mga isyu nga may kalabotan sa kalinaw ug kahapsay sa komunidad.
Lakip sa mga barangay nga aktibong nakigtambayayong sa maong inisyatiba ang Barangay Poblacion, Barangay Villaverde, ug Barangay Pala-o nga sakop sa hurisdiksyon sa ICPS-5.
Sumala sa kapolisan, ang Project Safe Link maoy usa ka moderno ug accessible nga paagi aron mas madasig ang partisipasyon sa publiko sa pagmintinar sa kaluwasan ug kalinaw sa ilang mga komunidad.
Photo Courtesy: Expat.com
