Nadakpan ang usa ka 22-anyos nga babaye human gikaingong nangawat og mga produktong pampagwapa sama sa nagkadaiyang kosmetiko ug grocery items sulod sa usa ka mall, daplin sa National Highway sa Tagum City, Davao del Norte, alas-4 sa hapon niadtong Hunyo 2, 2026.
Base sa report sa kapulisan, giila ang dinakpan nga si alyas “Zizy,” dalaga ug residente sa Pantukan, Davao de Oro, kinsa gidala sa Tagum City Police Station alas 7:50 sa gabii pinaagi sa mga security personnel nga miaresto kaniya.
Gikatahong nasakpan ang babaye samtang nagkuha og daghang mga produkto lakip ang mga pahumot, lipstick, eyeliner, foundation, eyeshadow palette, face powder, liniment, shampoo, ug powdered milk.
Sumala sa imbestigasyon, gitago sa suspek ang maong mga butang sulod sa iyang brown nga shoulder bag ug migawas sa establisemento nga wala mobayad sa cashier.
Human sa pagdakop, gipahibalo ang suspek sa hinungdan sa iyang pag-aresto ug sa iyang mga katungod sumala sa balaod sa pinulongan nga iyang nasabtan. Gipaubos usab siya sa medical examination sa wala pa ibalhin sa custodial facility sa kapulisan.
Sa pagkakaron, anaa na ang suspek sa Tagum PNP lakip ang mga ebidensya, samtang giandam na ang mga dokumento nga ipasang-at batok kaniya.
Photo Courtesy : Red Snapper Managed Services
