Giawhag sa Office of Civil Defense (OCD) 9 ang tanang Local Government Units sa Zamboanga Peninsula nga maghimo na daan ug mga preparasyon aron malikayan ang grabeng epekto sa posibleng El Niño nga gilauman sa umaabot nga mga bulan.
Sumala ni OCD 9 Regional Director Atty. Ruel S. Halanes , kon sa ilahang lebel kanunay sila nga naghimo ug pagpangandam apan mas naay dakong kapabilidad ang mga LGUs sa paghimo ug lakang alang sa paghimo ug plano kay sila ang frontliner sa ilang mga constituents.
Gidasig usab ni RD Halanes ang mga lokal official nga makig koordinar sa mga ahensya sa gobyerno alang sa hustong pagmonitor ug pagpatuman sa mga lakang sa posibleng hulaw.
Kon mahinumduman ang forecast sa PAGASA, adunay taas nga posibilidad nga motungha ang El Niño tali sa mga bulan sa Hunyo hangtod Agosto ug mahimong molungtad hangtod sa sayong bahin sa 2027.
Pagpaklaro usab ni RD Halanes nga ang posibleng masinatiang El Niño nga mahimong hinungdan sa gamay nga tsansa sa ulan ug taas nga temperatura sa daghang lugar sa Zamboanga Peninsula.
