Nakadawat og dungganong PhALGA Excellence Award in Local Governance ang City Government of Tandag atol sa 21st PhALGA Annual National Conference nga gihimo sa Dapitan City.
Ang maong nasudnong award gihatag ngadto sa mga Local Government Units (LGUs) nga malampusong nakab-ot ang Seal of Good Local Governance (SGLG), usa ka timailhan sa maayong pagdumala ug episyenteng serbisyo publiko.
Espesyal usab nga giila sa LGU si City Accountant Hector A. Sales tungod sa iyang dedikasyon ug lig-on nga paningkamot sa pagpatuman sa Good Financial Housekeeping ug maayong pagdumala sa pondo sa syudad nga nakatabang aron makab-ot ang maong award.
Matod sa city government, ang maong pag-ila usa ka timailhan sa panaghiusa ug paningkamot sa mga opisyal ug empleyado sa syudad aron masiguro ang transparent, responsable, ug epektibong serbisyo alang sa katawhan.
Ang PhALGA Excellence Award giisip nga usa sa mga prestihiyosong pagkilala alang sa mga LGUs nga nagpakita og maayong performance sa lokal nga pagdumala ug pinansyal nga pagpanubag.
Photo courtesy: City Government of Tandag
