Gipahigayon sa Cebu City Government ang ceremonial turnover sa nagkalain-laing imprastraktura nga proyekto sa syudad.
Lakip sa mga opisyal nga giturnover mao ang Road Concreting with Drainage System ug Construction of Curb sa Sitio Pailob, ingon man ang Construction of Portland Cement Concrete Pavement sa Sitio Alcantara, nga parehong nahimutang sa Barangay Sambag I.
Gi-turnover usab ang mga road concreting project sa Sitio Jasmin sa Barangay Capitol Site ug sa Sitio Acacia sa Barangay Lorega San Miguel. Gipangulohan ni Cebu City Mayor Nestor Archival ang maong turnover ceremony isip kabahin sa padayon nga programa sa siyudad alang sa pagpalambo sa imprastraktura ug serbisyo publiko.
Mitambong usab sa kalihokan ang mga opisyal sa Department of Engineering and Public Works (DEPW), uban sa mga kapitan sa barangay nga sila Kap. Maria Ailien Guardo sa Barangay Sambag I, Kap. Kelly Quijada sa Barangay Capitol Site, ug Kap. Nilo Dela Cerna sa Barangay Lorega San Miguel, kauban ang ilang mga konsehal. Opisyal nilang gidawat ang mga nahuman nga proyekto alang sa kaayohan sa ilang mga komunidad.
Ang proyekto sa Sitio Alcantara adunay kantidad nga P7.4 milyon, samtang P3.2 milyon ang kantidad sa proyekto sa Sitio Pailob. Sa Barangay Lorega San Miguel, ang road concreting project nagkantidad og P3.2 milyon, samtang P6.2 milyon usab ang gigahin alang sa proyekto sa Jasmin Street sa Barangay Capitol Site.
Sa iyang mensahe, gipasalamatan ni Mayor Archival ang kooperasyon sa mga barangay ug gihangyo ang mga residente nga suportahan ang kampanya sa siyudad bahin sa waste segregation ug environmental management.
Photo courtesy: Nestor Archival/Fb Page
