Gipailawom sa surprise drug test ang Tagum City Police Station niadtong nakalabay nga adlaw bandang alas 10:00 sa buntag ubos sa pagpanguna ni PLtCol Edgardo G. Bahan, OIC, kini aron masiguro ang pagsunod sa kampanya batok sa iligal nga droga ug sa direktiba sa Philippine National Police.
Mokabat sa 25 ka mga personnel sa Tagum CPS ang gipailawom sa drug test samtang duha usab ang wala makatambong tungod kay naka-leave. Ang maong lakang kabahin sa padayong paningkamot sa kapulisan aron maseguro nga limpyo ug andam sa pagserbisyo ang ilang hanay.
Matod ni PLtCol Bahan, gihimo ang maong kalihokan aron masiguro nga ang mismong mga kapulisan maoy ehemplo sa pagpatuman sa balaod ug wala maduhig sa paggamit sa iligal nga droga.
Dugang niya, importante nga mapadayon ang disiplina, propesyonalismo, integridad, ug pagsalig sa katawhan ngadto sa organisasyon sa kapulisan.
Photo Courtesy : istock
