Patay ang usa ka babaye human maaksidente samtang nagpraktis pagmaneho sa motorsiklo niadtong Mayo 25, 2026, alas 5:30 sa hapon sulod sa compound sa Central Elementary School sa Barangay Poblacion, Payao, Zamboanga Sibugay.
Base sa spot report sa Payao Municipal Police Station, ang biktima usa ka hamtong minyo, ug residente sa maong lungsod.
Sa inisyal nga imbestigasyon, kauban sa biktima ang iyang anak nga lalaki nga maoy unang nagtudlo kaniya sa pagmaneho sa ilang Suzuki FI 125 Skydrive Sport nga motorsiklo. Human sa pipila ka tuyok, ninaog ang iyang anak aron ang inahan nalang ang mag-inusara sa pagpraktis.
Apan samtang nagpadagan sa motorsiklo giingong naratol ang biktima ug aksidenteng mas napislit ang accelerator nga maoy hinungdan sa kusog nga dagan sa motor. Tungod niini, nawad-an siya og kontrol sa manubela ug mibangga ngadto sa building area sa eskwelahan diin naigo ang iyang liog sa koral.
Gidala gilayon ang biktima ngadto sa Payao Health Center alang sa dinaliang medikal nga atensyon, apan gideklarar kini nga dead on arrival sa Municipal Health Officer.
Samtang nagpahimangno ang mga otoridad sa publiko nga mag-amping ug sigurohon ang hustong pagtuon ug safety measures panahon sa pagkat-on og pagmaneho aron malikayan ang susamang trahedya.
