Dakpan ang usa ka SK Official, sa gikasang drug buy-bust operation sa Tubod, Surigao del Norte, nga napalitan og gitoohang illegal nga druga sa kagabii Mayo 24, 2026.
Gikasa ang operasyon pasado alas 7:45 ka gabii, sa Purok 2, Barangay San Isidro, Tubod, diin napusasan ang suspek nga nailhang si “Nel,” 24 anyos, ulitawo, adunay live-in partner, ug residente sa Purok 3, Barangay Timamana sa maong lungsod.
Sumala sa Tubod Municipal Police Station, usa ka poseur buyer ang nakapalit og usa ka sachet sa gitoohang illegal nga druga gikan sa suspek nga maoy hinungdan sa iyang pagdakop.
Atol sa body search, walay laing nakit-an nga kontrabando sa suspek. Apan sa pag-inspeksyon sa iyang gimanehong single motorcycle, nakit-an sa storage compartment o u-box ang duha pa ka sachet sa gidudahang illegal nga druga nga gisulod sa gamay nga pouch, color itom.
Gipangulohan ang operasyon ni PMAJ Mohammad Fahad Juwaldi, Acting Chief of Police sa Tubod Municipal Police Station.
Sa pagkakaron, anaa na sa kustodiya sa Tubod MPS ang suspek samtang gipadayon sa kapulisan ang pagproseso sa mga ebidensya ug pag-andam sa posibleng kaso nga ipasaka batok kaniya.
Photo Courtesy: Istock
