Kritikal karon ang kahimtang sa usa ka lalaki human kini gipusil niadtong ala-1:48 sa hapon Mayo 24, 2026, sa Ferido Street, Purok Galingan, Barangay Mankilam, Tagum City, Davao del Norte.
Giila ang biktima nga si alyas “Michael”, 33-anyos, residente sa Purok Macopa, Barangay Visayan Village, sa nasangpit nga syudad ug probinsya. Ang biktima kasamtangang giobserbahan karon sa ospital ug anaa matod pa sa kritikal nga kahimtang.
Base sa inisyal nga imbestigasyon, nag-estorya pa ang biktima ug ang suspetsado sulod sa usa ka KTV Bar, Ferido St, Brgy., Mankilam sa syudad diin gihagit pa sa suspek ang biktima nga manggawas apan kalit kining gipusil sa suspek sa tulo (3) ka higayon.
Human sa insidente, misibat ang responable pinaagi sa pagsakay og motorsiklo nga gimaneho sa iyang kauban padulong sa wala matino nga direksyon.
Miresponde gilayon ang SOCO Team aron maghimo og crime scene processing diin ilang narekober ang tulo (3) ka fired cartridge cases nga gituohang gikan sa usa ka .45 calibre nga pistola.
Gituohang personal nga panagbangi ang motibo sa insidente, apan giingon nga susihon pa usab sa mga otoridad ang uban pang mga anggulo sa maong panghitabo.
Samtang nagmando na si PLtCol Edgardo G Bahan, Officer-In-Charge sa Tagum PNP sa pag deploy ug personnel alang sa dragnet operation ug koordinasyon sa mga silingang estasyon aron masikop ang mga suspetsado.
