Dakpan sa hiniusang anti-illegal drug operation sa Philippine Drug Enforcement Agency Regional Office 13 Agusan del Sur Provincial Office ug Bunawan Municipal Police Station ang tulo ka drug personalities human mabungkag ang usa ka drug den sa Purok 4, Barangay San Teodoro, Bunawan, Agusan del Sur niadtong nakalabay nga adalw.
Sa buy-bust operation, nakumpiska sa mga operatiba ang gidudahang shabu nga adunay total standard value nga mokabat sa ₱34,000, uban ang lain-laing drug paraphernalia ug buy-bust money nga gigamit sa operasyon.
Lakip sa mga nadakpan ang usa ka 46-anyos nga lalaki nga giingong drug den maintainer, usa ka 47-anyos nga drug den visitor, ug usa usab ka 46-anyos nga giingong drug den employee. Ang tulo puros single ug residente sa Bunawan, Agusan del Sur.
Matod sa PDEA, ang malampusong operasyon resulta sa hugot nga koordinasyon sa mga law enforcement agencies, suporta sa local government units, ug kooperasyon sa komunidad sa kampanya batok sa ilegal nga droga.
Nag-atubang karon og kaso ang mga nadakpan tungod sa paglapas sa Sections 5, 6, 7, 11 ug 12, Article II sa Republic Act No. 9165 o Comprehensive Dangerous Drugs Act of 2002.
Photo courtesy: PDEA-13
