Pito ka higayon nga naluwas sa nagkalain-laing disgrasya ang usa ka lalaki, nga gingalan ug si Frane Selak, nga halos ikamatay na unta niya ug ang mas nakapakurat pa gyud kay human sa tanan niyang naagian, nakadaog pa siya og kapin 1.1 million dollars sa lotto niadtong 2003, mao nga gitawag siya ug“most unluckiest lucky man”.
Nagsugod ang serye sa iyang mga aksidente niadtong 1962 sa dihang nahulog sa suba ang iyang gisakyang tren ug 17 ka tawo ang nalunod, apan siya nakalangoy ug nakalingkawas nga adunay gagmayng samad lamang. Sunod tuig, 1963, nag-crash usab ang iyang gisakyang eroplano human dili maabli og lock ang pultahan niini. Nakaambak siya sa eroplano bisan walay parachute, apan milagro gihapon siyang nabuhi human mahulog sa baga nga dayami sa usa ka uma samtang 19 ka tawo ang namatay sa maong aksidente.
Wala pa nahuman ang iyang kalisod kay niadtong 1966, ang bus nga iyang gisakyan nidiretso usab sa suba diin upat ang namatay, apan siya nakalangoy ug gamay rang mga samad ang naangkon. Pag-abot sa 1970, nasunog kalit ang iyang sakyanan tungod sa guba nga fuel pump ug natanggong siya sulod niini, pero nakagawas gihapon siya bisan nasunog ang iyang buhok.
Niadtong 1995, nabanggaan usab siya og bus samtang mitabok sa dalan apan minor injuries ra ang iyang naangkon. Pagkasunod tuig, 1996, miambak siya gikan sa bintana sa iyang sakyanan aron malikayan ang bangga sa usa ka truck. Nakahawid siya sa kahoy samtang iyang nakita ang iyang sakyanan nga mibuto og kusog.
Human sa tanan niyang makamatay nga mga aksidente ug milagrosong pagkaluwas, niadtong 2003 misulay siya og taya sa lotto ug nakadaog og kapin 1.1 million dollars sa edad nga 40 anyos. Hangtod karon, daghan gihapon ang natingala sa iyang istorya ug nag-ingon nga bisan “pinaka malas,” usa gihapon siya sa pinaka swerte nga tawo sa kalibutan.
Photo Courtesy: AV FactsStories
