Arestado ang usa ka lalaki human nakuhaan ug improvised shotgun atol sa gilusad nga checkpoint operation sa may Purok 3, Barangay Balucot, Tambulig, Zamboanga del Sur, kagahapon, Mayo 24, 2026.
Ang dinakpan nagpangidaron ug 46-anyos, construction worker, ug residente sa Dumingag, Zamboanga del Sur.
Sa imbestigasyon sa kapulisan, una silang may nadawat nga taho kabahin sa usa ka indibidwal nga nagsakay sa usa ka Rusi 125 mga motosiklo nga gituohang nagdala ug usa ka improvised shotgun.
Atol sa operasyon, na flagged down sa kapulisan ang suspetsado human kini nagpakita ug kadudahang lihok, ug namatikdan pa sa otoridad ang handle sa improvised shotgun nga nilabaw gikan sa iyang gisudlang jacket.
Nabawi sa kapulisan ang usa ka improvised shotgun nga walay serial number, usa ka empty magazine, usa ka brown wallet, ug usa ka black Rusi 125 motorsiklo.
Ang suspetsado lakip ang nakumpiskang butang gidala sa Tambulig Municipal Police Station alang sa tukmang lakang.
Photo Courtesy: ZSPPO PIO, PRO 9
