Giserbihan sa warrant of arrest sa Dapitan City Jail ang usa ka lalaki nga Top 3 Most Wanted Municipal Level tungod sa kasong Qualified Rape of a Minor. Giila ang akusado nga si Ruel Egaro Namit, 36-anyos, minyo ug residente sa Purok 2, Barangay New Carcar, lungsod sa La Libertad, Zamboanga del Norte.
Ang suspek nag-atubang sa duha ka ihap sa maong kaso nga gipagula sa Family Court, Branch 4, 9th Judicial Region, Dapitan City, pinetsahan Mayo 19, 2026. Samatang walay girekomendar nga pyansa ang korte alang sa kagawasan sa akusado kinsa anaa nagpabiling gibalhog sa Dapitan City Jail alang sa tukmang disposisyon.
Padayon ang hugot nga pag-awhag sa kapulisan sa katawhan sa komunidad sa dali nga pakigkoordinar kung adunay mamatikdan nga mga indibidwal nga pinangita sa balaod aron dali nga pagsikop niini.
Photo Courtesy: istock
