Patay nga napalgan ang mag-apohan nga naanod sa kusog nga baha sa suba sa Purok 6, Brgy. San Agustin, Digos City human sa kapin 12 ka oras nga search, rescue, and retrieval operation. Ang mga biktima giila nga sila Teresita “Tessy” Tormis Juban, 65-anyos ug usa ka Barangay Health Worker (BHW), ug ang iyang apo nga si Melanie Villaluz Juban, 5-anyos.
Sumala sa City Disaster Risk Reduction and Management Office Digos, unang nakit-an ang lawas ni Nanay Teresita pasado alas 10:00 sa gabii didto sa Purok Dos, Balutakay, Hagonoy. Samtang, pasado alas 7:00 sa buntag karong adlawa, nakit-an usab ang lawas sa bata sa dapit sa Tiguman, duol sa kanhing ilimnanan nga “WalWal,” human kini ireport ni PB Jose Nacua ngadto sa mga otoridad.
Nahinumdoman nga nahitabo ang kalit nga pagbaha tali sa alas 4:30 hangtod alas 5:00 sa hapon kagahapon, diin naanod ang mag-apohan tungod sa kusog nga tubig gikan sa Matti River. Matod pa sa CDRRMO Digos, nahimong malampuson ang operasyon pinaagi sa hiniusang paningkamot sa nagkadaiyang ahensya ug mga barangay nga miapil sa pagpangita ug pag-retrieve sa duha ka biktima.
Nagpasalamat usab ang City Government of Digos pinaagi ni CDRRMC Chairperson ug City Mayor Josef Fortich Cagas ug Acting CDRRM Officer John Basil Alicarte Sevilla sa walay hunong nga suporta, kooperasyon, ug dedikasyon sa tanang responders ug volunteers nga mitabang sa operasyon.
Lakip sa mga miapil sa retrieval operation mao ang Philippine Coast Guard, Bureau of Fire Protection, CDRRMO Digos, MDRRMO Hagonoy, ug mga BDRRMC sa Barangay San Agustin, Tiguman, Igpit, ug Matti.
Gipasalamatan usab sa mga otoridad ang panaghiusa ug kusog sa matag responder nga nahimong dakong tabang aron hingpit nga mahuman ang operasyon.
Samtang, nagpahimangno ang mga otoridad sa publiko nga mag-amping ilabina panahon sa kusog nga ulan ug pagtaas sa tubig, ug likayan ang pagduol sa mga suba aron malikayan ang susamang trahedya.
