Nasunog ang usa ka balay human giingong gidaoban mismo sa bana tungod sa selos ug panaglalis sa iyang asawa didto sa Purok Pulutan, Barangay Awasian, dakbayan sa Tandag, alas 8:30 sa buntag, Mayo 19, 2026. Ang suspek giila nga si Jesus Verano, 45-anyos, usa ka mag-uuma ug residente sa maong lugar.
Base sa impormasyon nga nakuha sa Junader Radyo Newsteam gikan sa ilang silingan nga si Vivian Mamac, nagsugod ang panaglalis sa magtiayon human mikuyog ang asawa sa ilang mga silingan nga nangaligo sa dam nga duol sa ilang pinuy-anan.
Matod pa, dili kini unang higayon nga nag-away ang magtiayon kay bisan sa miaging adlaw atol sa pista sa ilang lugar adunay na silay panagbangi. Wala na mapugngi ang ilang init nga argumento human sa pista hangtod miabot sa punto nga nagbinastusay og sulti ug misangpot sa pagsunog sa ilang balay.
Nasayran usab nga nakainom og ilimnong makahubog ang magtiayon sa wala pa nahitabo ang insidente. Nagtuo ang ilang mga silingan nga selos ang posibleng hinungdan sa maong insedente.
Sa pagkakaron, anaa na sa kustodiya sa Tandag City Police Station ang suspek alang sa hustong disposisyon og posibleng atubangon ang kasong arson nga ipasaka batok kaniya.
Photo courtesy: CDRRMO-TANDAG
