Gi-turnover bag-ong building sa Department of Labor and Employment XI – Davao de Oro Field Office nga nahimutang sa Capitol Grounds, Cabidianan, Nabunturan niadtong nakalabay nga adlaw.
Mitambong sa seremonya si DOLE XI Regional Director, Atty. Randolf C. Pensoy, kauban si DOLE Davao de Oro Provincial Director, Neil Allan R. Baban, uban sa lig-on nga suporta sa Provincial Governor, Gov. Raul G. Mabanglo. Nakigbahin usab sa maong okasyon sila Mayor Levi S. Ebdao ug Mayor Cesar Colina, kauban ang uban pang mga lider ug bisita nga nagpamatuod sa kahinungdanon sa panaghiusa sa maong panagtigom.
Matod ni DOLE XI Regional Director, Atty. Randolf C. Pensoy, nga ang maong bag-ong building natukod pinaagi sa panaghiusa sa mga liderato ug buhatan sa DOLE.
Dugang pa ni Atty. Pensoy nga ang maong bag-ong two-storey building nga adunay roof deck adunay gilapdon nga 1,136.98 square meters ug nagkantidad og P27 milyon. Usa kini ka dakong garbo ug kadasig tungod kay mao kini ang pinakaunang building nga natukod gikan mismo sa ilang pondo ug makatabang sa paghatag og mas maayong serbisyo sa mga katawhan sa Davao de Oro.
Gipahayag usab sa DOLE XI Regional Director ang iyang garbo ug pag-awhag nga hinaut makita sa ubang field offices nga posible ang pagtukod og kaugalingong building pinaagi sa panagtinabangay ug panaghiusa sa mga elective officials, national government agencies, local government units, ug tanang ahensya. Dako kaayo kini og tabang aron makahimo og pasilidad ug lugar nga makahatag og episyenteng serbisyo alang sa mga katawhan sa Davao de Oro.
Photo Courtesy: DOLE XI Davao de Oro Field Office
