Nagpasidaan ang Department of Trade and Industry sa mga negosyante sa Zamboanga Sibugay batok sa sobra nga pagpataas sa presyo sa mga palaliton o overpricing. Kini kabahin sa kampanya sa ahensya aron mapanalipdan ang mga konsumidor ug masiguro nga patas ang presyo sa merkado.
Gipalig-on karon sa Department of Trade and Industry sa Zamboanga Sibugay ang monitoring sa presyo sa mga batakang palaliton sa mga merkado, grocery stores, ug uban pang establisemento sa probinsya.
Sumala sa DTI, regular nga ginabuhat ang price inspection aron masiguro nga nagsunod ang mga negosyante sa suggested retail price o SRP sa mga produkto sama sa de lata, noodles, kape, sabon, ug uban pang basic commodities.
Gipahimangnoan usab sa ahensya ang mga tindahan nga mahimong atubangon ang silot ug kaso kon mapamatud-ang nagpatuyang sa overpricing o dili pagsunod sa balaod sa presyo.
Kabahin usab sa programa ang information campaign aron mahibal-an sa publiko ang hustong presyo sa mga palaliton ug asa sila mahimong makareklamo batok sa mga abusadong negosyante.
Giawhag sa DTI ang mga konsumidor nga mahimong mapanid-anon ug magreport dayon sa ilahang opisina kon adunay makitang sobra nga presyo sa merkado.
