Nasikop sa mga otoridad ang usa ka giilang High Value Target (HVT) human sa gihimong buy-bust operation sa San Francisco, Agusan del Sur niadtong Mayo 18, 2026, alas 3:46 sa hapon sa Purok 2A, Barangay 5.
Ang operasyon gipahigayon sa mga sakop sa Philippine Drug Enforcement Agency Region 13 Agusan del Sur Provincial Office, kaubang pwersa sa San Francisco Municipal Police Station.
Nadakpan ang suspetsado nga giila nga si Jezreel Herbolingo y Cartahina, 44-anyos, minyo, ug residente sa Purok 3A, Barangay Awa, Prosperidad, Agusan del Sur.
Base sa report, nakuha gikan sa operasyon ang usa ka heat-sealed transparent plastic sachet nga gituohang shabu nga may gibug-aton nga mga 5 gramos, nga gibanabana og kantidad nga ₱34,000.
Nasakmit usab ang buy-bust money ug usa ka Samsung keypad phone nga giingong gigamit sa transaksyon.
Gipasakaan og kaso ang suspetsado tungod sa paglapas sa Section 5 (Sale of Dangerous Drugs), Article II sa Republic Act 9165 o Comprehensive Dangerous Drugs Act of 2002.
Photo courtesy: PDEA-13
