Nakuha sa Surigao del Sur Police Provincial Office (SDSPPO) ang mga ilegal ug walay buhis nga sigarilyo nga nagkantidad og kapin P275,000 human kini boluntaryong gitugyan sa usa ka lokal nga courier hub sa lungsod sa Tagbina.
Nahitabo ang turnover niadtong Mayo 16, 2026 alas 9:15 sa buntag didto sa J&T Express Hub sa Purok-3 San Jose, Barangay Poblacion, Tagbina, Surigao del Sur.
Sumala sa report, samtang nag-routine inspection ug sorting sa mga parcel ang staff sa courier hub, nakabantay sila og mga kahon nga kahina-hinala. Sa ilang mas lawom nga pagsusi, ilang nadiskubrehan nga ang sulod niini mao ang mga sigarilyo nga walay marka sa buhis gikan sa Bureau of Internal Revenue (BIR).
Ang mga parcel gitumong unta sa usa ka recipient nga nailhang “Liam” sa Zone II, Barangay Sto. Niño, Hinatuan, Surigao del Sur. Tungod sa posibilidad nga ilegal ang mga kargamento, gilayon nga gikontak sa management sa J&T Express ang kapulisan ug boluntaryong gitugyan ang mga kahon.
Narekober sa otoridad ang lima ka dagkong kahon sa “Greenhill Menthol Cigarettes” nga adunay kinatibuk-ang 500 reams ug gibanabana nga balor nga P275,000.
Dali usab nga miresponde ang hiniusang pwersa gikan sa Tagbina Municipal Police Station ubos sa pagpanguna ni PMAJ John Zydrick A. Preciados, kauban ang Surigao del Sur 1st Provincial Mobile Force Company ug 1301st MC RMFB13 aron himuon ang opisyal nga inventory ug dokumentasyon sa mga nakompiskar nga sigarilyo. Gihimo usab ang operasyon uban sa koordinasyon sa Bureau of Customs (BOC), Bureau of Internal Revenue (BIR), ug Department of Trade and Industry (DTI).
Matod sa kapulisan, nakalapas kini sa Republic Act No. 10643 o Graphic Health Warnings Law ug Republic Act No. 9211 o Tobacco Regulation Act of 2003.
Sa pagkakaron, anaa na sa kustodiya sa Tagbina Municipal Police Station ang mga nakompiskar nga sigarilyo alang sa hustong dokumentasyon ug disposisyon.
Photo courtesy: SDSPPO
