Gipasabot sa Nabunturan Water District ang publiko kalabot sa mga reklamo sa pipila ka konsumante tungod sa hinay nga agas, lubog nga tubig, sa pipila ka mga barangay sa lungsod.
Sumala sa water district, ang mga problema nagsumikad sa ilang ginahimong flushing activity ug transmission line tapping aron masulbad ang reklamo sa hugaw o lubog nga tubig ug aron mapalambo pa ang distribusyon sa serbisyo sa tubig.
Sa pakighinabi sa Juander Radyo Nabunturan News Team, gipahayag ni Ms. Cherry Amor A. Tito, manager sa Nabunturan Water District, nga nagbutang sila og pump station aron mahatagan og supply ang mga lugar nga kaniadto dili maabtan sa serbisyo.-
Padayon usab ang reklamo sa pipila ka mga konsumante nga dugay na kunong problema ang hinay nga agas sa tubig, ug yellow ang kolor niini. Aduna usab reklamo nga adunay balas ug hugaw nga mosulod sa ilang mga gripo.
Gipasabot sa manager nga ang flushing activity makatabang aron mawagtang ang sediments ug mga hugaw nga maoy mahimong hinungdan sa pagkalubog sa tubig.-
Bisan pa niini, nangayo og pagsabot ang Nabunturan Water District ngadto sa publiko samtang ginapadayon nila ang mga proyekto ug maintenance activities aron mas mapalambo ang kalidad sa serbisyo ug masiguro ang limpyo ug luwas nga tubig alang sa tanang konsumante.
