Misaka ang inflation rate sa rehiyon sa Caraga niadtong Abril 2026 kumpara sa Marso 2026 tungod sa paspas nga pagsaka sa presyo sa pagkaon ug transportasyon.
Sumala kang Guillermo M. Lipio Jr., Regional Director sa Philippine Statistics Authority Caraga, ang pangunahing hinungdan sa mas taas nga inflation rate mao ang pagtaas sa presyo sa “Food and Non-Alcoholic Beverages” nga miabot sa 10 porsyento niadtong Abril gikan sa 4.2 porsyento lamang niadtong Marso 2026.
Matod pa sa PSA, ang maong commodity group maoy adunay pinakadakong kontribusyon sa kinatibuk-ang inflation sa rehiyon nga mokabat sa 59.5 porsyento.
Lakip sa mga produktong adunay dakong pagsaka sa presyo mao ang bugas nga misaka gikan sa 5.3 porsyento niadtong Marso ngadto sa 21.2 porsyento niadtong Abril.
Misaka usab ang presyo sa ubang pelagic fish sama sa tuna nga gikan sa 10.2 porsyento niadtong Marso ngadto sa 17.4 porsyento niadtong Abril. Samtang ang inflation rate sa tuna misaka usab gikan sa negatibong 2.4 porsyento ngadto sa 24.9 porsyento.
Gawas sa pagkaon, usa usab sa dakong nakaapekto sa inflation rate mao ang pagsaka sa presyo sa transportasyon nga miabot sa 27.6 porsyento niadtong Abril gikan sa 11.9 porsyento niadtong Marso. Kini adunay kontribusyon nga 33.7 porsyento sa kinatibuk-ang inflation sa rehiyon.
Base sa report sa PSA, dako usab ang pagsaka sa presyo sa gasolina nga niabot sa 66.3 porsyento gikan sa 27.8 porsyento niadtong miaging bulan.
Misaka usab ang plete sa ubang pampasaherong sakyanan sa karsada sama sa skylab o habal-habal nga gikan sa 7.5 porsyento ngadto sa 24.2 porsyento.
Samtang, mas paspas usab ang pagsaka sa presyo sa diesel nga niabot sa 126.7 porsyento kumpara sa 59.9 porsyento niadtong Marso 2026.
Photo courtesy: PSA Caraga
