Nangandam na ang Metropolitan Cebu Water District (MCWD) sa pagtabang batok sa posibleng grabeng epekto sa El Niño o huwaw nga gilauman sa ulahing bahin ning tuiga.
Matod ni Atty. John DX Lapid, bag-ong general manager MCWD nga nakighinabi na kini ngadto kang Cebu City Mayor Nestor Archival aron hisgutan ang mga lakang batok sa kakuwang sa tubig.
Base sa assessment sa MCWD nga posibleng mokulang og 43,000 cubic meters nga tubig kada adlaw tungod sa pagkunhod sa produksyon gikan sa Buhisan Dam, Cotcot River, Lusaran River, ug Jaclupan Water Facility.
Lakip sa giandam sa MCWD ang pag-drill og mga well site sa Kalunasan ug ubang barangay sa south district, expansion sa Apas ug desalination facilities sa Opao ug Mambaling, ingon man ang Cordova pipeline project kauban ang Vivant Corporation.
Sa bahin sab ni Cebu City Mayor Nestor Archival, nipahimangno kini ngadto sa publiko nga magdaginot sa pagkonsumo sa tubig ning panahon sa ting-init.
Magdeploy usab og Mobile Siphon Tanks sa mga barangay nga wala maabot sa water grid sama sa Cabinocot ug Bonbon. Libre usab nga tubig ang ihatag sa Kagamhanan Sa Dakbayan Sa Sugbo pinaagi lang sa mga awtorisadong water tanker aron malikayan ang iligal nga pagbaligya og tubig sa kabukiran.
Photo Courtesy: mcwd.gov.ph
