Supak si Digos City Mayor Josef Fortich Cagas batok sa impeachment complaint kontra kang Vice President Sara Duterte ug klarong gipadayag nga dili siya mosuporta sa bisan unsang lihok nga iyang giisip nga politikal nga paglutos.
Sa iyang opisyal nga social media account, gipahayag ni Cagas nga isip usa ka proud Digoseño ug independenteng politiko nga walay kaanib nga national o lokal nga partido, supak siya sa pag-endorso sa impeachment complaint batok kang Vice President Sara Duterte.
Matod pa sa mayor, sukad pa niadtong 2016 suportado na niya ang pamilya Duterte sa dihang nidagan pagka-Presidente si kanhi Pangulong Rodrigo Duterte, ug mipadayon usab ang iyang suporta kang Sara Duterte atol sa 2022 elections isip Bise Presidente.
Gibutyag usab ni Cagas nga iyang gisuportahan ang pamilya Duterte tungod sa iyang personal nga pagtuo ug kombiksyon, ug dili tungod sa bisan unsang politikal nga organisasyon o partido.
Dugang pa niya, ang iyang posisyon gibase sa prinsipyo, patas nga proseso, panaghiusa, ug tinuod nga kabalaka alang sa kapakanan sa katawhang Pilipino, dili alang sa politikal nga interes ug pagkabahinbahin.
