Gitunol ang tseke ug sertipiko pinaagi sa seremonyal nga kalihokan alang sa upat (4) ka People’s Organizations (POs) nga gilangkuban sa mga kanhi miyembro sa Communist Terrorist Group (CTG), kaniadtong Mayo 4, 2026, didto sa Provincial Kapitol Koronadal City. Ang matag organisasyon nakadawat og ₱300,000, nga moabot sa kinatibuk-ang kantidad nga ₱1.2 milyon isip puhunan sa ilang mga livelihood projects.
Kini nga inisyatiba nahimong posible pinaagi sa paningkamot sa 2nd South Cotabato Provincial Mobile Force Company (2nd SCPMFC), ubos sa pagpanguna ni PLTCOL Roel Vergel G. Parreño ug sa pagdumala ni PCOL Samuel T. Cadungon. Ang maong yunit mao ang labing unang nagtukod og People’s Organization sa tibuok PNP SOCCSKSARGEN aron matabangan ang mga kanhi rebelde nga makabaton og malungtarong panginabuhian.
Mitambong usab sa maong kalihokan sila Governor Reynaldo S. Tamayo Jr., DSWD XII Regional Director Loreto V. Cabaya Jr., ug mga representante gikan sa OPAPRU ug Armed Forces of the Philippines (AFP). Ang maong programa ubos sa PAMANA Livelihood Program nga nagtumong sa pagpalig-on sa ekonomiya sa mga komunidad nga naapektuhan sa kasamtangang panagbangi.
Pinaagi niining maong hinabang, gilauman nga mas mapalig-on pa ang tinguha sa gobyerno alang sa kalinaw ug kalamboan. Tumong niini nga mahatagan og higayon ang mga kanhi sakop sa CTG nga mabalik sa komunidad nga adunay produktibong panginabuhian, layo sa kagubot, ug mabuhi nga malinawon uban sa ilang mga pamilya.
Photo Courtesy:2ND SCPMFC
