Nagtigom ang mga lumad kon Indigenous Peoples (IP) sa Barangay Bukal, Nabunturan, Davao de Oro, alang sa pagpahigayon og tree planting activity niadtong nakalabay nga adlaw, isip kabahin sa pagpatuman sa Adopt a Tree Program.
Gipili sa grupo ang tradisyonal nilang tanom nga pal-a, nga gigamit isip pangunang sangkap sa paghimo sa ilang lokal nga produkto nga gitawag og pal-a wine. Gawas sa pagpanalipod sa kinaiyahan pinaagi sa pagtanom, tumong usab sa maong kalihokan nga mapadayon ang tradisyon ug kultura sa mga lumad, ilabina ang ilang pamaagi sa paghimo sa tradisyonal nga ilimnon.
Sumala ni Jury Maynucas Tribal Chieftain sa tribong Mansaka, nga plano usab sa grupo nga palapdan ang paghimo sa tradisyonal nga wine sa tibuok lungsod sa Nabunturan, gamit lamang ang maong tanom isip sangkap, aron mapreserbar ang ilang kabilin ug mapalambo ang lokal nga produkto sa Barangay Bukal.
