Nasunog ang usa ka bus sa National Highway, Barangay Darong, Sta. Cruz, Davao del Sur alas 6:30 sa buntag niadtong Abril 29, 2026. Sumala sa report sa Sta. Cruz Municipal Police Station, ang maong bus gimaneho ni Ray Jay Amagos, 38-anyos, minyo ug residente sa Southern Paligue, Padada, Davao del Sur.
Sa pahayag sa driver, padulong unta sila sa Holy Cross College Davao aron motambong sa usa ka seminar kauban ang iyang mga pasahero. Apan pag-abot sa lugar sa insidente, nadungog niya ang kusog nga buto gikan sa wala nga ligid sa bus.
Sa iyang pagsusi, nasuta nga nag-aso na ang maong ligid, hinungdan nga iyang gipanaog dayon ang tanang pasahero aron malikayan ang posibleng disgrasya. Wala madugay, kalit nga midilaab ang bus ug gilamoy sa kalayo.
Mapasalamaton kini nga walay bisan usa sa mga pasahero ang naangol sa insidente. Ang mga sakay sa bus gilangkuban sa mga estudyante sa Southeastern College sa Padada.
Padayon ang imbestigasyon sa mga otoridad aron matino ang hinungdan sa maong sunog.
