Subay sa nagkaduol nga ASEAN Summit 2026, anaa na sa katapusang hugna sa pagpangandam ang Dakbayan sa Sugbo aron masiguro ang kahapsay sa dagan sa maong kalihokan.
Bisan pa man nga ipahigayon ang mga dagkong kalihukan sa Lapu-Lapu City, dako gihapong papel ang gibuhat sa syudad sa Sugbo ilabi na sa pagsuporta sa logistics ug pagdumala sa dagan sa trapiko sa mga agianan sama sa South Road Properties (SRP) ug Cebu-Cordova Link Expressway diin moagi ang mga delegado.
Sumala ni Cebu City Mayor Nestor Archival, andam na ang siyudad sa aspeto sa seguridad ug trapiko, uban sa klaro nga plano aron malikayan nga makasamok sa publiko.
Posibleng adunay ipatuman nga temporaryong road closures sa pipila ka dalan, apan kini himuon sa hustong oras ug limitado lamang aron dili makaapekto pag-ayo sa mga motorista.
Gihingusgan usab sa lokal nga panggamhanan ang mga clean-up operations, ilabi na sa SRP corridor, ug nakigkoordinar sa mga nasudnong ahensya alang sa pagbutang og ASEAN welcome markers ug uban pang visual materials aron maabiabihon ang pagdawat sa mga bisita.
Giawhag sa siyudad ang mga residente nga makigtambayayong pinaagi sa pagplano daan sa ilang biyahe, pagsunod sa mga advisory, ug pagtabang sa pagmintinar sa kalimpyo sa ilang mga komunidad.
Sa hapit na matapos ang pagpangandam, gipasigarbo sa Cebu City ang iyang kahimtang nga andam motabang sa malampusong pag-host sa ASEAN Summit ug sa pagpakita sa usa ka organisado, malinawon, ug maabiabihong palibot alang sa tanang delegado ug bisita.
Photo credits: ditosapilipinas.com
