Mibati og pagkadaot ang kalidad sa hangin sa Metro Cebu human mosaka sa “very unhealthy” nga lebel ang Air Quality Index (AQI), sumala sa Environmental Management Bureau sa Central Visayas (EMB-7).
Sa datos gikan sa monitoring station sa Talisay City, misaka ang AQI gikan sa 112 niadtong Abril 18 ngadto sa 199 alas 8 sa buntag sa sunod adlaw. Nagpasabot kini nga ang kahimtang sa hangin mahimong makadaot sa panglawas sa tanang katawhan, dili lamang sa mga adunay daan nang sakit sa baga o kasingkasing.
Nasuta nga ang fine particulate matter o PM2.5 milapas sa gitugot nga limitasyon ug maoy hinungdan sa padayon nga aso nga nabantayan sa Metro Cebu sukad Abril 17.
Samtang, ang PM10 nagpabilin sa “fair” nga lebel, mas ubos ang risgo kumpara sa PM2.5 apan nakacontribute gihapon sa polusyon.
Sa Toledo City, ilabi na sa Barangay Cabitoonan, nagpabilin sa normal nga lebel ang PM2.5 ug PM10 base sa monitoring.
Gipasabot sa mga otoridad nga ang pagsaka sa polusyon resulta sa stagnant nga kahimtang sa atmosphere tungod sa taas nga kainit ug high-pressure system nga nagpugong sa pagkatag sa hugaw nga hangin.
Tungod sa kakuwang sa kusog nga hangin, natipon ang aso, abog ug emissions gikan sa mga sakyanan ug pabrika sa Metro Cebu.
Dugang pa, nakapuno usab ang mga lokal nga hinungdan sama sa abog sa karsada, aso sa mga sakyanan, sunog sa sagbot, ug bag-ong mga sunog sa residential ug komersyal nga mga lugar.
Photo credits: Personal photo
