Nadiskubrehan sa mga otoridad ang kapin Php2 milyon nga kantidad sa marijuana didto sa Sitio Bagtok, Kasapa 1, Loreto, Agusan del Sur, Abril 16, 2026.
Nasayran nga miabot sa PHP 2,212,000 ang kinatibuk-ang kantidad sa illegal nga tanom nga nakuha pinaagi sa hiniusang anti-illegal drug operation nga gipangunahan sa Philippine Drug Enforcement Agency (PDEA) kauban ang lokal nga kapulisan.
Narekober sa maong operasyon ang gibana-bana nga 11,000 ka punoan sa fully grown marijuana plants ug dugang 300 ka seedlings gikan sa usa ka kaumahan nga adunay gidak-on nga 15,000 square meters.
Nasayran usab nga ang responsable nga maoy nag-cultivate sa maong plantasyon mao ang usa ka lokal nga residente ug mag-uuma nga nailhan sa alyas nga “Gusion.”
Padayon karon ang gihimong imbestigasyon ug manhunt operation sa mga awtoridad aron madakpan ang maong suspek samtang gihugtan pa ang pagmonitor sa lugar aron masiguro nga dili na mobalik ang pagpananom og marijuana sa maong dapit.
Photo Courtesy: Agusan del Sur PNP
