Gipahigayon sa 4-H Club Northern Mindanao ug ATI-Region 10 ang bag-o lang nahuman nga 4-H IGNITES Regional Camp 2026 sa Jay Farmville, Iligan City gikan Abril 14–16, nga gipartisipahan sa mga miyembro niini.
Sumala ni Iligan City Agriculturist Marie Ann Beley, nagpakita kini sa padayon nga suporta sa lokal nga kagamhanan sa pagpalambo sa agrikultura pinaagi sa kabatan-onan, ilabi na sa paghulma sa sunod henerasyon sa mga mag-uuma.
Atol sa camp, gipalig-on ang kahibalo sa mga partisipante pinaagi sa nagkalain-laing training, workshops, ug praktikal nga aktibidad nga may kalabotan sa modernong pamaagi sa pag-uma.
Gidasig usab ang mga ginikanan nga ipaapil ang ilang mga anak sa 4-H Club aron mapalambo ang ilang liderato ug partisipasyon sa komunidad, samtang gipasiguro sa buhatan nga magpadayon ang suporta aron mas mapalambo pa ang kahanas ug kahibalo sa mga batan-ong mag-uuma alang sa lig-on nga food security sa nasod.
