Nadiskubrehan sa mga tropa sa kasundalohan ang mga materyales nga gituohang gigamit sa paghimo og improvised explosive device o IED sa Sitio Palompon, Barangay Mahaba, Marihatag, Surigao del Sur niadtong nakalabay nga adlaw.
Gihimo ang operasyon sa 75th Infantry Battalion ug 1st Civil-Military Operations Company ubos sa 401st Infantry Brigade human sila nakadawat ug report gikan sa usa ka concerned citizen bahin sa presensya sa kadudahang gamit pang-gyera sa maong lugar.
Sa maong operasyon, narekober sa mga sundalo ang upat ka galon sa giingong Nitro Energetic Molecule nga posibleng gigamit sa paghimo og IED. Gilayon kining gisiguro ug gidala sa Palompon Patrol Base alang sa hustong disposisyon.
Sumala sa militar, ang maong nadiskubre nagpakita sa padayon nga operasyon ug pagbantay batok sa hulga sa insurgency, ug makatabang sa pagpahuyang sa kapasidad sa CTG sa paghimo sa pagpangatake sa mga tropa sa gobyerno ug sa mga sibilyan.
Sa katapusan, gidayeg usab sa 401st Brigade ang kooperasyon sa komunidad nga mitabang sa pag-report sa impormasyon, nga giingong dako og papel sa paglikay sa posibleng kadaut sa lugar.
Photo Courtesy: 401st Infantry Brigade
