Patay ang usa ka miyembro sa New People’s Army (NPA), samtang napugos pag-atras ang ubang kauban niini sa nahitabong engkwentro sa Surigao del Sur.
Nahitabo ang panag-engkwentro sa Sitio Bulacan, Barangay Bolhoon sa lungsod sa San Miguel probinsya sa Surigao Del Sur pasado alas dose sa udto Abril 15, 2026, kon diin nagtinabangay nga pwersa sa 75th Infantry Battalion ug 3rd Special Forces Battalion ubos sa 401st Infantry Brigade sa pakig-engkwentro sa mga rebelde.
Sa report sa militar, usa ka rebelde nga nailhan sa alyas “Ka Keroy” ang napatay atol sa engkwentro, samtang narekober usab sa tropa sa gobyerno ang lima ka high-powered firearms ug ubang kagamitan.
Gihimo ang operasyon human makadawat og impormasyon ang kasundalohan gikan sa usa ka residente nga gikapoy na sa ginahimong pagpangilkil sa mga miyembro sa walhong grupo sa ilang komunidad.
Matod pa sa 401st Brigade, dako’g epekto ang maong kalampusan sa pagkaluya sa pwersa sa NPA sa North Eastern Mindanao, samtang padayon ang ilang operasyon aron masiguro ang kalinaw sa lugar.
Photo Courtesy: 401st Infantry “Unite N Fight” Brigade, Philippine Army
