Gipahibalo sa Civil Service Commission (CSC) Davao de Oro Field Office nga abli na ang filing sa Civil Service Exam applications sugod Mayo 14 hangtod Hunyo 3, 2026.
Sumala ni Evette Monarca sa CSC atol sa pag-ronda opisina sa Juander Radyo News Team, ang Davao de Oro adunay lahi nga cut-off date kumpara sa ubang bahin sa Region 11, ug kutob lamang Hunyo 3 ang dawaton nga aplikasyon sa maong lugar.
Ang Civil Service Examination ipahigayon sa Nabunturan Comprehensive National High School. Nagpasalamat usab ang CSC sa Department of Education (DepEd) sa libre nga paggamit sa mga pasilidad sa eskwelahan.
Matod pa sa CSC, makaya sa venue ang hangtod 2,000 ka examinees, apan mao lamang kini ang maximum nga ihap tungod sa limitasyon sa mga classroom ug pasilidad.
Gi-awhag sa Civil Service Commission ang publiko nga mag-aplay ug mosulay sa Civil Service Exam, ilabi na kadtong wala pa nakatake sa pasulit.
Dugang sa CSC, pwede na moapil bisan wala pa nakagradwar sa kolehiyo, basta 18-anyos pataas. Gi-awhag usab ang mga kwalipikadong pamilya ug higala nga mag-apply.
Ang exam fee ₱500 ug kini ang kataposang Civil Service Exam alang sa tuig 2026, busa gidasig ang tanan nga dili maglangan sa pag-file ug bisitahon ang opisyal nga Facebook page sa CSC Davao Region.
