Miabot sa 191 ka mga indibidwal ang nadakpan, nasita, ug na-neutralize sa gipakusgang kampanya batok sa kriminalidad nga gilusad sa Surigao del Sur Police Provincial Office (SDSPPO) sulod sa usa ka semana.
Ang operasyon, nga kabahin sa Regionwide Simultaneous Anti-Criminality Law Enforcement Operations (SACLEO), gipahigayon gikan Abril 7 hangtod Abril 13, 2026 ubos sa pagpanguna ni Police Colonel Jeffrey Lawrence D. Mauricio, Provincial Director.
Sa kinatibuk-an, 75 ka koordinadong operasyon ang napahigayon sa tibuok probinsya nga nagtumong sa pagpahunong sa nagkadaiyang matang sa kriminalidad.
Sa kampanya batok sa ilegal nga droga, walo ka operasyon ang nahimo nga misangpot sa pagkadakop sa walo ka indibidwal, lakip ang pagpatuman sa duha ka search warrants.
Sa ilegal nga armas ubos sa Republic Act 10591, unom ka operasyon ang gipahigayon diin lima ka personahe ang nadakpan ug pito ka gagmay nga armas ang narekober o gitugyan. Apil usab niini ang duha ka search warrants nga gipatuman.
Sa pagdakop sa mga wanted persons, 19 ka indibidwal ang natimbog, lakip ang tulo ka most wanted persons ug 16 ka uban pang gipangita sa balaod pinaagi sa 16 ka operasyon.
Sa aspeto sa pagpanalipod sa kinaiyahan, tulo ka indibidwal ang nadakpan sa upat ka operasyon batok sa ilegal nga pagputol og kahoy, samtang 12 usab ang nadakpan sa 12 ka operasyon batok sa ilegal nga pagpangisda.
Sa kampanya batok sa insurgency ug terorismo, usa ka indibidwal ang misurender o nadakpan, diin narekober ang usa ka armas ug usa ka eksplosibong butang.
Dugang pa, tulo ka indibidwal ang nadakpan sa duha ka operasyon batok sa ilegal nga sugal. Samtang 140 ka katawhan ang nasita o napamultahan sa 23 ka operasyon kalabot sa paglapas sa lokal nga mga ordinansa.
Sumala ni PCOL Mauricio, ang kalampusan sa operasyon bunga sa lig-on nga panaghiusa tali sa kapolisan ug sa komunidad.
Photo courtesy: Surigao Del Sur Police Provincial Office
