Gipahibalo sa Social Security System (SSS) nga ilang gipakusgan ang ilang digital services aron masiguro nga walay hunong ang paghatag og benepisyo sa mga miyembro sa gawas sa nasud.
Sumala ni Napoleon Rabanal II, Senior Communications Analyst sa SSS Mindanao West Division, magpadayon ang access sa serbisyo pinaagi sa digital platforms.
Nag-una niini ang My.SSS Portal, nga nagtugot sa mga miyembro nga makafile og claims, makapangutang, ug makamanage sa ilang account online, bisan wala na mag-adto sa opisina.
Gipasiugda usab nga pinaagi sa mobile applications ug My.SSS Portal, mahimo kini buhaton bisan asa ug bisan kanus-a, basta kompleto ang requirements.
Giawhag usab ang mga OFWs nga magparehistro ug magpabiling aktibo ang ilang My.SSS account, tungod kay kini mao pamaagi sa pag-avail sa serbisyo labi na kung limitado ang physical access.
Dugang pa ni Rabanal, pinaagi sa mga feature sama sa online transactions ug ACOP Facial Authentication, mas sayon na alang sa mga miyembro ang pag-comply sa requirements ug pag-avail sa benepisyo nga dili na kinahanglang mobiyahe.
