Gipahugtan karon sa Barangay Libasan, Nabunturan Davao de Oro, ang pagpatuman sa mga ordinansa aron masiguro ang kalinaw ug kahapsay sa komunidad, ug malikayan ang bisan unsang matang sa kadautan nga posibleng makaapekto sa mga residente.
Sa eksklusibong pakighinabi sa Juander Radyo Nabunturan News Team, gipadayag ni Punong Barangay Kap. Richie D. Torrejas nga aduna na’y resolusyon nga giaprubahan aron lig-onon ang pagpatuman sa balaod sa barangay.
Sumala niya, ang tanang magmalapason sa mga ordinansa dakpon sa mga otoridad ug ipailawom sa community service isip silot.
Dugang pa ni Kapitan Torrejas nga ilang ipatuman sa higpit ang mga lakang sa peace and order, ilabi na aron mapugngan ang mga dautang aktibidad sama sa walay tuyo nga paglatagaw sa kagabhion og aron ma proteksyonan ang mga kabatan-onan.
Samtang, padayon usab ang pahimangno sa barangay sa tanang residente nga magtinabangay sa pagmintinar sa kalinaw ug mosunod sa mga balaod aron mapalambo pa ang kahimtang sa komunidad.
