Patay ang usa ka 5-anyos nga bata human kini malumos sa usa ka swimming pool sa usa ka beach resort didto sa Brgy. Catmon, Naval, Biliran pasado alas 10 sa buntag niadtong nakalabay nga adlaw.
Sumala pa sa impormasyon, miabot ang grupo sa pipila ka indibidwal uban ang maong bata sa naasoy nga lugar aron mangaligo diin gipahimangnoan sila sa caretaker nga i-monitor ang mga bata tungod adunay lawom nga parte ang swimming pool.
Matod pa sa caretaker nga nabantayan niya ang usa ka bata nga nagkupot sa kilid nga bahin sa kaligoanan ug gibadlong kini uban sa pag-pahimangno sa mga kaubanan niini sa padayon nga pag-monitor.
Apan pag-labay sa pila ka minuto gikan sa pagpahimangno niya ngadto sa mga kaubanan sa bata wala na nila kini makit-an pa.
Pag-abot sa laing grupo nga mogamit unta sa swimming pool, aksidente nga natamakan sa usa ka bata ang gahi nga butang ilawom sa maong pool diin gisusi kini sa caretaker kung unsa kini, iyang nadiskobre nga mao diay kini ang nawala nga bata.
Gisulayan pa sa pagluwas sa usa ka nurse nga naa sa lugar ang maong bata apan wala na kini nahimo pa, gidala ang bata ngadto sa Biliran Provincial Hospital (BPH), diin gideklara kini nga dead on arrival sa attending physician.
