Sikop sa gipahigayong drug buy-bust operation sa kapulisan ang usa ka tattoo artist sa Purok 6, Brgy Sta Isabel, Dipolog City Zamboanga Del Norte niadtong nakalabay nga adlaw.
Giila ang dinakpan nga si alyas Kiel, 24-anyos, ulitawo, residente sa Sitio Anahaw, Brgy. Galas sa dakbayan.
Nakuha gikan sa suspetado ang 1 ka gamay nga pakete sa shabu nga nagsilbing buy-bust item ug 500 peso bill nga gigamit isip buy bust money.
Dugang nasakmit gikan sa iyang posisyon ang lain pang duha ka mga gagmayng pakete sa shabu. Mokabat sa 2 ka gramo ang kinatibuk-ang nakuha gikan sa dinakpan nga nagkantidad ug Php13,600.00.
Tingkagol sa selda sa Dipolog City Police Station ang dinakpan alang sa tukmang disposisyon, samtang ang mga nakumpiska nga droga giturn-over ngadto sa ZDN Provincial Forensic Unit alang sa eksaminasyon.
Photo Courtesy: Bail bonds
