Padayong miubos ang kantidad sa pagpalit sa piso kon Purchasing Power of Peso (PPP) sa dakbayan sa General Santos base sa pinakabag-ong datos nga gipagawas sa Philippine Statistics Authority (PSA) Sarangani Province niining bulan sa Marso 2026. Subay sa report, mius-os ang bili sa piso ngadto sa PhP 0.76 itandi sa PhP 0.78 niadtong milabayng Pebrero, butang nga nagpakita sa padayong pagsaka sa presyo sa mga palitunon sa lokal nga merkado.
Gipasabot sa PSA nga tungod sa pagmahal sa mga serbisyo ug produkto, ang kantidad nga 100 pesos niadtong tuig 2018 nagkinahanglan na karon og PhP 131.3 aron makapalit sa susamang gidaghanon sa mga kinahanglanon. Sa laktod nga pagkasulti, ang usa ka piso kaniadtong 2018 nagkantidad na lamang og 76 sentimos karong Marso 2026. Kini tungod kay ang gahum sa pagpalit sukwahi sa lihok sa inflation; sa higayon nga mosaka ang presyo sa palitunon, awtomatiko usab nga mous-os ang bili sa salapi.
Sa gipakita nga Consumer Price Index (CPI), dako ang nahimong pagsaka sa index points gikan sa 124.7 niadtong Marso 2025 ngadto na sa 131.3 karong tuiga. Makita sa maong datos nga sukad niadtong 2018 hangtod 2025, ang PPP sa General Santos nagkunhod sa average nga 0.03 matag tuig. Ang maong datos nagsilbing giya alang sa publiko ug sa gobyerno aron masabtan ang dagan sa ekonomiya ug ang epekto sa krisis sa lana ug uban pang mga komunidad sa panginabuhi sa matag pamilya.
Photo Courtesy: PSA
