Gi-angkon sa Fertilizer and Pesticide Authority (FPA) Region 9 nga adunay mga distributor sa Zamboanga Peninsula nga namaligya ug mga abono nga ilegal.
Matod ni FPA 9 Supervising Specialist Alex Paalisbo, sa ilang gihimong inspection daghang mga distributor ilang nasakpan nga nagbuhat ug ilegal nga lihok sama sa pag rebag sa abono apan sa karon na minimize na ang maong buhat.
Dugang saysay ni Paalisbo, padayon nilang gipahugtan ang pag-inspection ug siya nagpaabot na ug pasidaan ngadto sa mga distributor o dealer nga dili magpahimulos sa kwarta sa mga mag-uuma.
Nunot niini, gidasig ni Paalisbo ang mga mag-uuma nga mopalit lamang gikan sa mga lisensyadong dealers ug distributor aron masiguro ang kalidad ug kaluwasan sa ilang gigamit nga abono.
Padayon usab ang koordinasyon sa Fertilizer and Pesticide Authority Region 9 uban sa lokal nga kagamhanan ug uban pang ahensya aron mapugngan ang pagkatag sa mga ilegal nga abono sa merkado.
Gipasabot nga ang paggamit sa substandard o peke nga abono mahimong makadaot sa produksyon sa tanom ug mahimong hinungdan sa dako nga kapildihan sa mga mag-uuma.
Samtang nagpadayon ang operasyon batok sa ilegal nga pamaligya, giingnan sa FPA ang publiko nga i-report dayon ang kadudang baligya ngaa abono ngadto sa ilang opisina aron kini ilang mahatagan ug aksyon.
Photo Courtesy:Fertilizer and Pesticide Authority
