Nasikop sa otoridad ang duha ka kanhi miyembro sa New Peoples Army-NPA sa managlahing operasyon sa Agusan del Norte ug Surigao del Norte. Gidakop ang duha ka babaye pinasikad sa standing warrants alang sa kasong human trafficking, murder, ug multiple attempted murder.
Giila ang mga suspek nga alyas “Lennie” ug “Anne,” parehong kanhi nalambigit sa armadong kalihukan sa Caraga. Si “Anne” usa ka regional most wanted person sa murder, samtang si “Lennie” provincial most wanted sa human trafficking.
Gipatuman ang operasyon sa Criminal Investigation and Detection Group (CIDG) uban ang kapulisan ug intelligence groups. Kini kabahin sa padayon nga kampanya sa Philippine National Police (PNP) aron madakpan ang pinangita sa balaod ug mahatagan og hustisya ang mga biktima.
