Nakadawat ang mokabat sa 722 ka rehistradong tricycle driver sa Island Garden City of Samal (IGACOS) niadtong nakalabay nga adlaw, pinaagi sa cash assistance nga gipanghatag sa Department of Social Welfare and Development (DSWD) uban sa City Social Welfare and Development Office (CSWD).
Sumala sa report, kabahin kini sa padayon nga paningkamot sa gobyerno aron maibanan ang kabug-at sa galastuhon sa mga driver tungod sa pagsaka sa presyo sa gasolina.
Sa maong ikaduhang adlaw sa payout, gisundan kini sa unang rollout niadtong Abril 8, diin 1,000 ka mga rehistradong driver usab ang nakadawat og tabang pinansyal.
Ang maong programa gituyo aron matabangan ang mga tricycle driver nga naapektuhan pag-ayo sa nagpadayon nga krisis sa fuel, nga nakapasaka sa ilang adlaw-adlaw nga gasto samtang nagkagamay ang ilang kita.
Dugang pa, kabahin kini sa mas lapad nga tubag sa nasyonal nga gobyerno aron suportahan ang mga sektor nga labing apektado sa nag usab-usab nga presyo sa petrolyo.
Photo Courtesy :Samal Information
