Gipalapdan pa sa Dakbayan sa Mandaue ang Libreng Sakay Program human midugang og duha ka bag-ong PWD-friendly nga e-vehicles aron mas daghang komyuter, ilabi na ang persons with disability (PWD), ang makabenepisyo.
Gisusi mismo ni Mandaue City Mayor Thadeo “Jonkie” Ouano ang mga bag-ong unit diin mukarga kini og kapin 20 ka pasahero ug adunay ramp alang sa mas sayon nga pagsakay sa mga PWD. Gibutangan usab kini og real-time monitoring camera aron masiguro ang kaluwasan sa mga pasahero.
Ang mga e-vehicles magserbisyo sa rota gikan sa Centro Mandue paingon sa University of Cebu Lapu-Lapu and Mandaue (UCLM) ug pabalik. Ang libreng sakay lakip ang bag-ong units mobyahe sa Lunes hangtod Biyernes gawas sa holidays.
Matod ni Ouano, ang programa gitumong aron makatabang sa adlaw-adlaw nga gastos sa mga lumulupyo ug dili aron makigkompetensya sa ubang sektor sa transportasyon.
Nagpasalamat usab ang mayor sa pribadong sektor sa ilang boluntaryong suporta, samtang giplano pa sa dakbayan ang pagdugang og upat ka e-vehicles alang sa ubang rota aron mas mapalapdan pa ang serbisyo sa publiko.
