Arestado ang usa ka motorcab driver human nga nasakmitan kini ug iligal nga drugang shabu pinaagi sa gilunsad nga drug buy-bust operation sa kapulisan sa Purok 3, Brgy Sta. Isabel, Dipolog City Zamboanga Del Norte niadtong Abril 4, 2026.
Giila ang dinakpan nga si alyas Peroy, 53-anyos, minyo ug residente sa Relocation Site, Brgy. Olingan susamang dakbayan.
Nabawi gikan sa dinakpan ang usa ka plastic sachet nga dunay sulod gituohang shabu nga nagsilbing buy-bust item, ug 500 peso bill nga gigamit isip buy bust money.
Dugang nasakmit gikan sa iyang posisyon ang lain pang duha ka pakete sa shabu ug uban pang mga non-drug items. Motimbang sa duha ka gramo ang nasakmit nga druga gikan sa suspetsado nga nagkantidad ug Php13,600.00.
Balhog sa selda sa Dipolog City Police Station ang dinakpan ug mag-atubang sa kasong paglapas sa RA 9165 kon Comprehensive Dangerous Drugs Act of 2002.
