Gipadayag sa Social Security System (SSS) Pagadian Branch nga andam kining mosunod sa direktiba sa Presidente ugaling magpagawas kini sa usa ka executive order nunot sa panawagan nga suspendihon ang monthly contribution sa mga myembro gumikan sa energy crisis ug padayon nga pagsaka sa presyo sa produktong petrolyo.
Sa pakighinabi sa Juander Radyo News Team kang SSS Pagadian Branch Head Edwin Remoto, gipadayag niini nga ang maong lakang usa pa lang ka proposal sa pagkakaron nga nagtumong sa posibleng moratorium sa deduction sa contributions sa mga SSS members.
Gidugang pa ni Remoto, ang susamang lakang nahitabo na kaniadto panahon sa pandemya, diin adunay gipatuman nga moratorium, apan giingon niya nga ang SSS magrespeto ug mosunod sa bisan unsang desisyon gikan sa taas aron matubag ang panginahanglan sa mga apektadong empleyado.
Sa pagkakaron, wala pay pinal nga desisyon bahin sa maong panawagan og padayon usab ang koordinasyon sa SSS sa ilang head office aron tun-an ang posibleng epekto sa ekonomiya sa nasud sa nahitabong gyera sa Middle East.
