Dili mamahimong mapa-ensured sa Philippine Crop Insurance Corporation o PCIC Region 9 ang mga sakayan o bangka sa mga mananagat nga wala narehistro sa Local Government Unit.
Sumala ni Isagani F. Templanza III, Insurance Underwriter I sa Marketing and Sales Division sa PCIC 9, kinahanglan nga rehistrado ang sakayan aron kini mahimong kwalipikado sa insurance coverage.
Gipasabot ni Templanza, nga ang maong polisiya gitumong aron masiguro ang legalidad ug husto nga dokumentasyon sa mga sakayan nga ipa-ensured.
Dugang pa niya, importante usab kini aron malikayan ang mga isyu sa pag-claim sa insurance kon adunay mahitabong aksidente o kadaot sa panginabuhian sa mga mangingisda.
Gidasig usab ni Templanza ang mga fisherfolk nga magparehistro sa ilang mga sakayan sa ilang tagsa-tagsa ka LGU aron mapahimuslan ang benepisyo sa insurance program sa gobyerno.
