Hugot nga giduso ni Gobernador Reynaldo Tamayo Jr. ang pagpapahimutang og modernong port crane sa Pantalan sa General Santos aron mapaspas ang operasyon sa logistiko ug mas mapalambo pa ang ekonomiya sa tibuok probinsya.
Sumala ni Tamayo, bisan pa og naggahin na og ₱2 bilyon alang sa kalamboan sa maong pantalan, limitado gihapon ang paglihok sa mga kargamento tungod sa kakuwang sa modernong ekipo.
Gipasabot ni Tamayo nga ang usa ka port crane makahimo sa pagbalhin og hangtod 35 ka container matag oras, samtang ang kasamtangang sistema makahimo lamang og pito (7) ka container sa mao gihapong gidugayon. Tungod sa kahinay sa operasyon, daghang dagkong kompanya sa South Cotabato—sama sa DOLE Philippines, Tupi Supreme, ug Cipabi—ang napugos sa pagpadala sa ilang mga produkto pinaagi sa Davao City tungod sa mas paspas nga serbisyo didto.
Matod ni Tyronn Jan Villanueva, pangulo sa South Cotabato Economic, Investment and Promotions Center (SCEIPC), ang maong proyekto maghimo sa South Cotabato nga usa ka lig-on nga agricultural export hub.
Kon mas barato ug mas paspas ang pagpadala sa mga produkto, mas modako ang kita sa mga mag-uuma sa asparagus, kape, cacao, ug cut flowers gikan sa Tupi ug Polomolok. Makatabang usab kini sa mga meat producers ug food processors sa paglihok sa ilang mga baligya.
Gilauman ni Villanueva nga kon moarang-arang ang dagan sa pantalan, mapadayon sa probinsya ang tinuig nga investment nga mokantidad og ₱15 bilyon hangtod ₱20 bilyon. Base sa datos, paspas ang pagsaka sa puhunan sa South Cotabato gikan sa ₱1 bilyon niadtong 2019 ngadto sa ₱27 bilyon niadtong 2025.
Ang maong lakang gilaumang maghatag og dugang trabaho ug magpahimutang sa South Cotabato isip sentro sa negosyo ug kalamboan sa rehiyon.
