Magsugod na sa Abril 10 ang paghatag og fuel assistance sa mga tricycle driver sa lima ka syudad sa Zamboanga Peninsula.
Sumala sa Department of Social Welfare and Development o DSWD-9, mokabat sa Php5000 ang ihatag sa matag benepisyaryo aron makatabang sa pagsaka sa presyo sa krudo.
Ipahigayon ang dungan nga payout sa Zamboanga City, Isabela City, Pagadian City, Dipolog City ug Dapitan City human sa pag-validate sa listahan sa mga benepisyaryo.
Matod ni DSWD 9 Regional Director Riduan P. Hadjimuddin, naghulat pa sila sa gi-validate nga listahan gikan sa mga lokal nga panggamhanan, ilabi na sa mga miyembro sa tricycle operators and drivers’ associations o TODA nga gi-certify sa social welfare offices.
Gipasabot usab nga duna pay proseso sa cross-matching aron malikayan ang duplication ug masiguro nga angayan lamang nga mga benepisyaryo ang makadawat sa ayuda.
Ang maong programa kabahin sa paningkamot sa national government aron makunhuran ang epekto sa pagsaka sa presyo sa lana sa sektor sa transportasyon, ilabi na sa mga tricycle driver nga nagsalig sa inadlaw nga kita.
Gilauman sa DSWD 9 nga pinaagi sa dungang implementasyon sa lima ka syudad, mas mapaspas ug mas episyente ang pag-apod-apod sa ayuda sa mga kwalipikadong drayber.
Photo Courtesy: Change.org
